An Kama ‘Yan Sandan Bogi Da Motoci Biyu Maƙare Da Wiwi Daga Wakilinmu
‘Yan sandan bogi da aka kama da wiwi
•••••••
A makon nan ne jami’an sojoji da ke aiki a ƙarƙashin shirin tsaro na musamman mai taken “Operation Lafiya Nakowa” da ke Birget ta 6, a Jihar Taraba, suka kama wasu ‘yan sandan bogi guda biyu, suna tafe da motoci ƙirar Hilux, maƙare da tabar wiwi.
A jawabin manema labarai daga ofishin Laftana Umar Muhammad, Muƙaddashin Mataimakin Daraktan Hulɗa da Jama’a na Birget ta 6 ta Rundunar Sojojin Najeriya, ya bayyana cewa sojojin tare da haɗin gwiwar jami’an Hukumar NDLEA ne suka yi nasarar cafke ‘yan sandan na bogi, a sakamakon bayanin sirri da suka samu. Sun kama su ne a Marabar Takum da ke Ƙaramar Hukumar Wukari, Jihar Taraba.
Sojojin da suka yi aikin
Waɗanda aka kama dai an same su ne suna sanye da kayan aikin ‘yan sanda na mobayil, da motocin Toyota Hilux guda biyu cike da abubuwan da ake zargin tabar wiwi ce.
Binciken farko ya nuna cewa dukkan ‘yan sandan na bogi ne. An gano cewa an loda wa motocin tabar wiwi ce a Akure, Jihar Ondo, kuma suna kan hanyarsu ta zuwa Jihar Adamawa ne, a yayin da aka tare su.
Motar Hilux da aka kama
Binciken ya ƙara tabbatar da cewa ɗaya daga cikin waɗanda aka kama, sunansa Monday George, kuma tsohon jami’in ɗan sanda ne mai muƙamin ASP, wanda aka kora daga aiki kuma shekararsa 71. A yayin da ɗayan kuma sunansa Ezeugo Destiny Uche, mai shekaru 41. Sai dai kuma waɗanda ke cikin motar Hilux ta biyu sun bar ta, suka gudu, a yayin da suka hango sojojin daga nesa.
‘Yan sandan bogi tare da wiwin da suka ɗauko
An ƙwato manyan ɗaurin tabar wiwi guda 1,134 daga motocin biyu. An miƙa duka waɗanda ake zargi da abubuwan da aka ƙwato ga ofishin NDLEA da ke Wukari don ƙarin bincike da gurfanar da su a gaban kotu.
___________
