Digirin Girmamawa: Ya Kamata Jami’o’in Najeriya Su Karrama Rarara
Daga Bashir Yahuza Malumfashi
_______________
A jiya Asabar, 27-03-1447 (Hijiriyya) = 20-09-2025 (Miladiyya), a Birnin Tarayyar Najeriya Abuja, shahararren mawaƙin siyasa, Dokta Dauda Kahutu Rarara ya samu karramawa ta musamman daga “WASU” da suka yi amfani da sunan Jami’ar European American University, inda suka ba shi lambar girmamawa ta Digirin Digirgir (Honorary Doctorate Degree).
Sai dai kuma abin takaici, daga baya aka samu sahihin labarin cewa, jami’ar ta bayyana cewa ba ita ce ta ba Dauda wannan digiri ba. Wannan ke nuna cewa wasu ‘yan damfara ne suka shirya wannan digiri na bogi.
Amma dai duk da haka, wannan karramawa, duk da cewa ba American European University ce ta gaske ta ba shi ba, amma hakan ya nuna irin rawar da Rarara ya taka kuma yake kan takawa wajen bunƙasa fasaha da tasiri a harkokin siyasa da al’adu a Najeriya. Don haka, ya kamata a samu wata sahihiyar jami’a a Arewacin Najeriya, ta ba shi wannan digiri na karramawa. Su kuma mutanen da suka shirya wannan damfara, ya kamata jami’an tsaro, musamman ‘yan sanda da EFCC su binciko su, domin su fuskanci hukunci, musamman yadda suka tozarta Najeriya a idon duniya.
Rarara ya shahara wajen rera waƙoƙin siyasa da suka zamo ruwan dare tsakanin talakawa, matasa da kuma shugabanni. Waƙoƙin nasa sun kasance masu jan hankali wajen yaɗa manufofi da saƙonnin jam’iyyu da ‘yan siyasa daban-daban. Duk da yake ana ganin waƙoƙinsa na siyasa ne, sai dai a haƙiƙanin gaskiya sun kuma taka rawa wajen ilmantarwa da nishaɗantarwa ga jama’a, musamman ma yadda ya faɗaɗa su zuwa na soyayya da sarauta.
Fasahar Rarara ta sha bamban da ta sauran mawaƙa saboda yadda yake amfani da kalamai masu girman ma’ana da karin magana wajen isar da saƙo. Waƙoƙinsa sukan ƙunshi darussa kan zaman lafiya, haɗin kai, juriya, da kuma buƙatar talaka ya fahimci rawar da yake takawa a dimokuraɗiyya. Wannan ya ƙara masa karɓuwa a tsakanin al’umma, musamman a Arewacin Najeriya.
Baya ga waƙoƙin siyasa, Rarara ya kuma yi fice wajen samar da sabon salo na haɗa waƙa da tarihi, inda yake kawo misalai da tunawa da abubuwan da suka faru a baya, don nuna alaƙa da halin da ake ciki. Wannan fasaha tasa ta tabbatar da cewa waƙar Rarara ba wai kawai ta siyasa bace, har ma wata hanya ce ta rubuta tarihi ta hanyar waƙa.
Saboda irin wannan gudummawa da kuma tasiri a fannoni daban-daban, ba abin mamaki ba ne ganin yadda wasu suka yi amfani da sunan jami’a mai girma kamar European American University suka karrama shi da wannan digiri. Wannan karramawa alama ce ta yadda duniya ke gane irin gudummawar da mawaƙa ke bayarwa wajen faɗakarwa da sauya tunanin jama’a.
Karramawar da Rarara ya samu a yau, tabbas za ta ƙara masa ƙarfin gwiwa wajen ci gaba da fitar da waƙoƙi masu ma’ana da kuma ƙara bunƙasa fasahar Hausa. Haka kuma, zai zama abin koyi ga sauran mawaƙa da masu tasowa domin su ga cewa waƙa na da daraja kuma za ta iya kawo girmamawa daga manyan cibiyoyi.
A ƙarshe, muna taya Dauda Kahutu Rarara murna bisa wannan gagarumin matsayi da ya samu. Wannan karramawa ba wai tasa ce kaɗai ba, ta haɗa har ma da al’ummar Hausawa da Najeriya baki ɗaya.
Allah ya ƙara masa basira da kuma nasara a dukkan al’amuransa.
_______________
