ALLAH JI ƘAN AMINU DOGO
__________
Wannan ƙasida daga Bashir Yahuza Malumfashi, Fasihin Galadiman Katsina, ta’aziyya ce ga Alhaji Aminu Ɗantata, wanda ya rasu a ranar Asabar, 03-01-1447 (Hijiriyya), 28-06-2025 (Miladiyya).
__________
1
Da farko ni na yi himma,
Nai nufina babu hamma,
Zan yi roƙo babu homa,
Rabbi tanyo ni da goma.
Ta’aziyyarsa Aminu Dogo.
2
Alhayyu kai ka yi rayuwa,
Kai ke mai kawo rasuwa
Ko gida ko ko kasuwa
Jiddun fa kai ke wanzuwa.
Ka tufata ruhin Aminu Dogo.
3
Ya Manzona ɗan Amina.
Ya mai tsarki mai sakina.
Ya mai Makka gwarzon Madina.
Masoyinka yau ya mirgina.
Yai wafati Aminu Dogo.
4
Bawan Allah ya yi suna
Halaye nai sun yi rana
Mai himma ne ko’ina na.
Ba ya shirgi shi da sauna.
Mai daraja ne Aminu Dogo.
5
Dukiya tai babu tsatsa,
Romo daɗi in ka tsotsa
Goro marsa babu tsutsa
Aikin ɓur sai dai su tusa.
Allah ka ji ƙan Aminu Dogo.
6
Ga uban al’umma kwata
Aikin Allah ya kwatanta
Duk marayu ya killata
Raunana shi ya suturta
Aikinsa ne Aminu Dogo.
7
Bai gadara ba ya homa,
Ba ya raini bai taƙama.
Aikinsa kullum salama.
Haka kuma shi bai zalama.
Kun ji halayen Aminu Dogo.
8
Ya riƙe Allah da Manzo.
Ba ya fashin keta hazo.
Kai ziyara tai ga Manzo.
Har mutuwa tai da taz zo.
Wannan shi ne Aminu Dogo.
9
Dogo fari mai haiba,
Fararen tufafi ya saba.
Farar zuciya ba ya gaba.
Burinsa kullum cigaba.
Bawan Allah Aminu Dogo.
10
Katangar suga mai kauri.
Bangon ƙarfe mai ƙwari.
Ingarma ne mai sauri.
Ruwan Jakara ba bauri.
Allah yafe wa Aminu Dogo.
11
Mai nasiha mai nuni,
Mai zumunci mai tsani.
Mai ƙana’a mai bayani.
Aikin assha shi yai hani.
Wannan shi ne Aminu Dogo.
12
Ya jama’a ga roƙona.
Mutan Kano har Kaduna
Jama’ar Borno har Katsina.
Duk duniya har Dekina.
Ku mai addu’a Aminu Dogo.
13
Ina ‘ya’yansa, duk ‘yan uwa,
Ina masoya, kui yo zuwa,
Ina sarakai masu ƙawa,
Malamai, ya masu baiwa.
Yau kuma babu Aminu Dogo.
14
Ni Bashir yau na yi shela,
Ina maƙiyansa masu talla?
Suna ta kira wai ya shilla!
To ya tafi, ai sai kui Gala!
Allah ka ji ƙan Aminu Dogo.
15
Ya Allahu gafarta masa.
Ya Rahim sanyaya masa.
Ya Affuwu, sauƙaƙa masa.
Ya Salam, ka faranta masa.
Allah yafe wa Aminu Dogo.
__________
© Bashir Yahuza Malumfashi
Lahadi, 04-01-1447 (Hijiriyya)
29-06-2025
__________
