Lale Marhabin Da Sabuwar Shekarar Musulunci (1447)
Daga Bashir Yahuza Malumfashi
Sabuwar Shekarar Musulunci wata dama ce da take zuwa sau ɗaya a shekara, domin ta zama wata kafa ta tunani, gyara da kuma sabunta niyyar aikata alheri.
Wannan lokaci ne da ƙidayar ranaku da watanni ke farawa bisa tsarin Musulunci kuma yake farawa daga watan Muharram – ɗaya daga cikin watanni mafi daraja a cikin kalandar Musulunci.
Wannan lokacin, muhimmancinsa ba wai don shagulgula ba ne kawai, amma lokaci ne na zurfafa tunani da komawa ga Allah. A cikin wannan muƙala, za mu duba muhimmancin sabuwar shekarar Musulunci ga al’umma tare da danganta hakan da koyarwar Alƙur’ani da hadisan Manzon Allah (SAW).
√ Muhimmancin Tuna Kurakurai na Shekarar Baya:
Lokacin sabuwar shekara, dama ce ga kowane Musulmi ya tsaya ya duba rayuwarsa ta shekarar da ta gabata. Ya duba kurakuran da ya aikata, zunubai da rashin cika alƙawura da sauransu. A cikin Alkur’ani mai girma, Suratul Tahrim, aya ta takwas, Allah (SWT) ya ce: “Ya ku waɗanda suka yi imani! Ku tuba zuwa ga Allah da tuba ta gaskiya…”
Wannan aya tana ƙarfafa wa mutum gwiwa wajen duba rayuwarsa, domin ya tuba daga kurakuransa. Babu shakka aikata kuskure ko laifi, halayya ce ta ɗan Adam, amma mafi alherin mutum shi ne wanda zai gane kuskurensa kuma ya tuba, tare da tsarkake niyyar ba zai sake aikata shi ba. Allah yana son masu tuba, domin kuwa shi mai gafara da yafiya ne ga bayinsa.
√ Muhimmancin Yin Shiri Domin Sabuwar Shekara:
Sabuwar shekara lokaci ne da Musulmi ya kamata ya sabunta niyyarsa ta kyautatawa. Yin shiri na zahiri da na baɗini, yana taimaka wa mutum wajen cin ma nasarori masu kyau da albarka a rayuwarsa. Bukhari da Muslim sun ruwaito hadisi, inda Manzon Allah (SAW) yake cewa: “Kowane aiki yana tare da niyya…” Saboda haka, yin niyyar gyara da shiri mai kyau abu ne mai matuƙar amfani ga kowane mutum.
√ Abubuwan Da Suka Kamata Mutum Ya Aikata Domin Ci Gaba:
A yayin da muka shiga sabuwar shekara, ya kamata Musulmi ya nemi ilimi, ya rage zaman banza, ya kula da iyali da al’umma, kuma ya yawaita addu’a da istigfari. A cikin Suratu Zalzala, aya ta bakwai, Allah ya ce: “Wanda ya aikata aikin alheri ko da ƙwayar zarra ne, zai gan shi…”
Wannan yana nuni da cewa kowanne aiki, ƙarami ko babba, yana da muhimmanci kuma Allah ba zai tozarta mai aikata alheri ba.
√ Nasiha Ga Rayuwa:
Rayuwa tana da ƙunci da sauƙi kuma tana buƙatar natsuwa da haƙuri. Saboda haka, kada mu kasance cikin ruɗin duniya, mu riƙe gaskiya, mu zamto masu tausayi da sadaukarwa. Mu guje wa zari da ƙyashi da hassada, kamar kuma yadda ya kamata mu guji rowa da kwaɗayi. Mu zamanto masu amfani ga kanmu da kuma junanmu.
√ Mu Tuna Akwai Mutuwa da Hisabi:
Ɗaya daga cikin manyan darussan da sabuwar shekara ke tunatarwa shi ne cewa lokaci yana wucewa, mutuwa na gabatowa, kuma hisabi yana nan. Allah (SWT) a cikin littafinsa mai girma Alkur’ani, Suratu Ali Imran, aya ta 185 yana cewa: “Kowane rai zau ɗanɗana mutuwa…”
Wannan tunatarwa ce a gare mu, cewa ya kamata mutum ya kasance cikin shiri a kowane lokaci, domin kuwa kowane lokaci mutum na iya komawa ga Allah, da zarar adadin lokacin mutum ya yi. Kuma mu sani akwai hisabi a ranar lahira, domin tantance ayyukan mutane, mai kyau da akasinsa.
√ Muhimmancin Kulawa Da Ibada:
Yawan azumi, salla, karatun Alƙur’ani da yin ayyukan alheri suna daga cikin hanyoyin gyaran kai a cikin wannan sabuwar shekara. Musamman a cikin wannan wata na farko na Muharram, ana ƙarfafa mutun da yin azumi, musamman azumin Ashura da Tasu’a. Wannan yana nuni da cewa sabuwar shekara tana da falala idan aka yi amfani da ita ta hanyar ibada.
√ Ƙarfafa Sada Zumunci Da Taimakon Juna:
Wannan lokaci ne da ya kamata Musulmi ya duba dangantakarsa da iyalansa, ‘yan uwa, abokai da maƙwabta da sauran al’umma. A hadisin da Tirmizi ya ruwaito, Manzon Allah (SAW) ya ce: “Ba ya daga cikinmu wanda ba ya jin tausayin ƙanana, kuma bai girmama manya ba.” Yin haka yana taimakawa wajen yauƙaƙa zumunci, yana kawo zaman lafiya da cigaba a cikin al’umma.
√ Muhimmancin Kiyaye Lokaci:
A wannan shekarar sabuwa, ya kamata mutum ya zama mai daraja da kiyaye lokaci. Lokaci, wata ni’ima ce daga Allah, kuma za a tambayi mutum yadda ya yi amfani da shi. Ke nan ya kamata mu rika amfani da lokacinmu wajen aikata abubuwan da suka kamata, waɗanda za su amfani rayuwarmu, ba sharholiya da shashanci ba.
√ Mu Tsarkake Zukatanmu:
A sabuwar shekara, ya kamata Musulmi ya kankare zuciyarsa daga hassada, ƙiyayya, da mugunta. Allah ya ce: “Ku gafarta, ku yi sulhu, ku yi adalci. Allah yana son masu adalci.” (Suratu Ma’ida: 42). Hakan zai sa rayuwar mutum ta kasance cikin nutsuwa da kwanciyar hankali.
Daga ƙarshe, sabuwar shekara ta Musulunci wata dama ce ta komawa ga Allah, gyara rayuwa, da kuma gyara dangantaka da mutane. A yi amfani da wannan lokaci wajen tabbatar da cewa ana rayuwa bisa koyarwar addini. Saboda haka, mu ɗauki wannan sabuwar shekara a matsayin sabuwar dama ta tsarkake kai, yin alheri, da shirya wa lahira. Allah ya sa mu dace da sabuwar shekara mai albarka. Amin.
_______________
Bashir Malumfashi, shi ne Babban Editan Mujallar Taskar Gizago (online)
