HANJIN JIMINA
Daga Bashir Yahuza Malumfashi
_____
Bismillah ni zan fara,
Da godiya gun Allah,
Ubangiji Rahamanu,
Mai juya dukkan yayi,
Ba zan gaza yo dace ba.
Ni nai yabo ga Rasulu,
Manzo mijin su Khadijah,
Baban su Rukayya, Fatima,
Gwarzo Badadin Allah,
Tsira da amincin Rabba.
Ya ‘yan uwa ku taho nan,
Ku ban aron kunnuwanku,
Zan ɗan zubo tambihi,
Ɗan tsokaci da nasiha,
Ban zaɓi tozarci ba.
Lallai mu lura mu gane,
Yau zamani ya canza,
Ya zo da launi-launi,
Wani baɗini, wani buɗe,
HANJIN JIMINA ne babba.
Yau ga waya ta salula,
Ta ƙunshi tsarin tsurfa,
Wani kam da kyau, ba laifi,
Wani har akwai amfani,
Wani kau guba ne babba.
Yau waya fa ta zama tsani,
Mai ingiza aikin fasadi,
Wasu na ta nuna tsiraici,
Wasu ma suna yin sata,
Kaico! Abin bai kyau ba.
Ga abin takaici muraran,
Wannan waya ‘yar hannu,
Ɗalibanmu duk ta kangarar,
Ta hana su duba kitabu,
Sai sharholiya ba wai ba.
Wasu na ga matan aure,
Sam ba su tsoron Allah,
Shaiɗan suke wa aiki,
Ta salula sun zama fajirai,
Ba su daina shashanci ba.
Yau ga matasan namu,
Sun daina neman tsaba.
Sun riƙe waya don Yahoo,
‘Yan damfara ba lasi,
Aikin ga bai rana ba.
Kaicon budaren namu,
Wai don gadarar suna,
Sun mamaye kan TikTok,
Aure suke gun jinsi,
Ba su bar rawar tamɓele ba.
Yau ina iyayen yara?
Lallai ku buɗe idanu,
Ku ne kuke tarbiyya,
Aikinku ne ku yi gyara,
Ba ku ga zaman hutu ba.
Ya ku matasa ku gane,
Mazanku har matanku,
Ku mai da hankali sosai,
Ilimi fa shi ne tsani,
Mai shi ba zai taɓe ba.
Ku kiyayi aikin kasada,
Na Shaiɗan baban adawa,
Limamin haddasa fitina,
Shi ne uban salula,
Mai bin shi bai dace ba.
Lallai ku riƙe karatu,
Na Allah, har da na boko,
Sannan ku ɗau tarbiyya,
Ku guje wa illar salula,
Ba kwa rasa yin toho ba.
Mai baituka dai ni ne,
Bashir Yahuza Gizago,
Malumfashi garina,
Na roƙi Allah dace,
Ba zai ƙi tanyo na ba.
– Tammat –
__________
© Bashir Yahuza Malumfashi
Alhamis, 24-11-1446 (Hijiriyya)
22-05-2025 (Miladiyya)
__________
