RANAR HAUSA TA DUNIYA:
LITTAFINA NA FARKO DA AKA WALLAFA A 1997
Daga Bashir Yahuza Malumfashi
A yayin da a yau muke murnar RANAR HAUSA TA DUNIYA, bari in waiwaya baya in zaƙulo littafina na farko da na fara wallafawa a duniya, duk da cewa ba shi ne na farko da na fara rubutawa ba.
Littafin BABBAN TARKO, an wallafa shi a 20 ga Janairu, 1997 (Miladiyya), ranar da ta yi daidai da 12 ga Ramadan, 1417 (Hijriyya). Kamfanin Wallafa na Informart Publishers, S.11, Ibrahim Taiwo Road, Kaduna ya wallafa shi, a ƙarƙashin shugaban kamfanin, Malam Ibrahim Sheme.
Ƙirƙirarren labarin soyayya ne tsakanin wata mata mai suna Jamilatu da Jafaru ɗan Alhaji Ɓuntu.
Lokacin da na ɗauko littafin yau ina karantawa, na yi ta sharara dariya, musamman yadda na ga ƙuruciyar yarinta, ɓaro-ɓaro a cikinsa. Lallai Hausawa sun yi gaskiya da suka ce ƘURUCI DANGIN HAUKA.
•••
ALLAH ƘARA ƊAUKAKA HARSHEN HAUSA. AMIN!
