HANYAR TSIRA
(SAW)
~~~~~~~
Na sadaukar da wannan ƙasida ga dukkan masoya Manzon Allah,
Annabi Muhammadu (saw). Allah sa ya cece mu a gobe ƙiyama. Amin.
~~~~~~~
Sha yabo a duniya,
Mustapha Rasulullah.
Mai mukami a lahira,
Muhammadu Nabiyullah.
Hanya ce miƙaƙƙiya,
Shugabanmu Nurullah.
Shiriya ce Muƙaddima,
Garnaƙaƙi Habibullah.
Mai ɗaukaka da muhibba,
Auwalu Waliyullah.
Fitila maganin duhu,
Zahiri yake Sallallah.
Inuwa maganin zufa,
Sayyadinmu Abdullah.
Ruwan sanyi maganin ƙishi,
Jagoranmu mai Allah
Mai haƙuri wane damo,
Fitilar ibadullah.
Jarumi uban jarummai,
Na Khadija Badadullah.
Mai kwarjini a nan take,
Mujittapha Rahmatullah.
Mai ƙarfi na zahiri,
Mai make duk aduwullah.
Mai kyautar maimaituwa,
Baban Fatima Khairullah.
Mai nasara a ko’ina,
Annabinmu barakallah.
Shugaban duk halittu,
Mai ceton bayin Allah!
~~~~~~~
© Bashir Yahuza Malumfashi
Litinin 06-05-1445 (Hijiriyya)
20-11-2023 (Miladiyya)
~~~~~~
