MUTUM – Ƙarshen Zance
~~~~~~~
Bashir Yahuza Malumfashi, ya yi nazari game da mutum da rayuwarsa, sannan ya rubuta waɗannan baitoci da nufin faɗakarwa. Lallai ya kamata mu yi nazari cikin natsuwa domin yin abin ya dace da rayuwarmu, a lokacin da muke da dama. Ba sai damar ta kuɓuce ba.
~~~~~~~
Related posts
Kai ne mutum dube ka,
Yau ina gadarar k’arfi?
Kai ne a nan kalle ka,
Yau ina tinƙahon ya tafi?
Kai ne ajin masu kuɗi,
Yau ƙasa tai maka murfi.
Kai ne da lissafin ‘ya’ya
Yau ka yi ƙarƙon kifi.
Kai ne bushashar shagali
Jiya har ana maka tafi.
Kai ne a mulki Sarki,
Yau ga ka sabon shafi.
Kai ne da tarin mata,
A Ingila ne ko Kurfi.
Kai ke sa dole a yi,
Yau ga shi ba ka da ƙarfi.
Duniya ba ki da tabbas,
Lahira jimla a tafi.
Mance da aikin banza,
Kauce batun mai tsafi
Dage da bautar Allah,
Hujja takobin kaifi.
~~~~~~~
© Bashir Yahuza Malumfashi.
Ya Rubuta Tun Ranar
Litinin 23-07-2018
~~~~~~~
