Daga Mukhtar Mudi Spikin
Kamun Ludayin Jemage
Salwa salihar tsuntsuwa ta ce “Rawar Jemage ta yi kama da ta Babba-Da-Jaka, sun san hanyar ƙuntata wa tsuntsaye, amma kamar ba su san hanyar kyautatawa da sauƙaƙawa tsuntsaye ba, Kaico!”
Kurciya ta ce “Lamarin dai masu mulkin tsuntsayen dajin nan sai addu’a kurum. Wai kuna da labarin cewa Jemage ya shirya tsaf zai fara raba sulalla takwas-takwas a sheƙar tsuntsaye miliyan sha biyu har tsawon wata shida don a rage wa tsuntsaye raɗaɗin cire tallafin ruwan sinadiri? Ina hikima a nan? To bayan wata shida shi sai a dawo gidan jiya ke nan ko me?”
Hazbiya ta kada baki ta ce “To yanzu ni da nake da ‘ya’ya sha biyu a sheƙata, me sulalla takwas za su yi min? Kawai dai an shiryo wata hanyar wawashe sulallan dajin nan ne kurum.”
Kanari ta ce “Wai kun ji su Ragon-Maza ma neman ƙarin sulalla suke ko? Wai sulallan da ake ba su a majalisa sun yi kaɗan. Tun da su masu uwa a bakin murhu ne, har an sahale za a ƙara musu sulalla malala gashin tinkiya, mu kuma tsuntsaye mu je mu mutu ko?”
Alhudahuda, wanda tun da aka fara magana bai ce komai ba, ya kalli tsuntsaye ya ce “Duk wannan maganganun da kuke yi, su Jemage da muƙarrabansa sun sani, sun san wannan hanyar da suka ɗauka ta ƙarya ce, amma fa suna sane, a kullum suna nuna wa tsuntsaye cewa su ɗin ba su da basirar warware matsaloli yadda ya kamata ne don ai ta cece-kuce, a duk shirmen nan faɗa mun abu ɗaya da suke yankewa, wanda zai cutar da su? A kodayaushe sai dai su kawo tsarin da zai cutar da mu!”
Cikin takaici, sai Hudahuda ya kece da ruwan Turanci kamar Gwamna Gwalangwam. Ko me yake nufi? Oh o’o, ga dai abin da na jiyo yana faɗa:
“The elaborate act of our leaders masquerading as fools constitutes a Machiavellian stratagem that pervades the pages of history. By adeptly donning this cloak, they adroitly divert attention, manipulate public perception, and evade the very essence of accountability.”
Da yawan tsuntaye dai jikinsu ya yi sanyi daga yadda Jemage ya fara kamun ludayinsa.
~~~~~~~
Mukhtar Mudi Sipikin,
15-07-2023.
~~~~~~~~
