Daga Bashir Yahuza Malumfashi
Buƙatarmu Mu Bunƙasa Rayuwar Mata, Matasa Da Kyautata Muhalli – Gwamnan Jigawa
Gwamnan Jihar Jigawa, Malam Umar Namadi, ya bayyana cewa babban ƙudurinsa shi ne ya ga ya samar da kyakkyawan yanayin muhalli, tare da bunƙasa rayuwar mata da matasa, ta hanyar samar da ayyukan yi da sana’o’in dogaro da kai,
Gwamnan ya bayyana haka ne, a yayin wata ƙwarya-ƙwaryar ziyarar aiki da ya kai a Hedkwatar Cibiyarb Inganta Muhalli ta Ƙasa, kamar yadda Babban-Sakataren Watsa Labarai, Malam Hamisu Gumel ya bayyana wa manema labarai.
A yayin ziyarar tasa, Gwamnan ya samu kyakkyawar tarba daga Daraktan hukumar, Dokta Maina Bukar da ma’aikatansa. Ya yaba da yadda hukumar ke gudanar da aikinta na inganta muhalli a faɗin ƙasar nan, wanda ya haɗa da magance zaizayar ƙasa da kwararowar hamada. Ya ce jiharsa ta Jigawa tana ɗaya daga cikin jihohi 11 na ƙasar nan da suke fuskantar wannan ƙalubale na sauyin yanayi da ke lalata muhalli.
Da yake ƙarin bayani ga Shugaban Hukumar, Gwamna Namadi ya lissafa irin tallafin da yake nema, waɗanda suka haɗa da dashen itatuwan marmari domin yaƙi da kwararowar hamada, bunƙasa noman rani domin samar da abinci da kuɗin shiga, ta hanyar samar da fanfunan ban ruwa masu aiki da hasken rana. Haka kuma ya buƙaci yadda za a horar da matasa da mata, ta hanyar koya masu sana’o’in hannu domin dogaro da kai.
Sauran buƙatun sun haɗa ba manoma horo na musamman da koyar da su dubarun noman zamani da ban ruwa ta amfani da rijiyoyin burtsatse da sauran hanyoyin bunƙasa rayuwar al’umma, wanda ya yi daidai da alƙawuran da gwamnan ya ɗauka a yayin yaƙin nan zaɓe.
Gwamnan ya jaddada muhimmancin samar da abubuwan bunƙasa rayuwar al’umma, waɗanda suka haɗa da samar da ingantaccen ruwan sha a wasu sassa na jihar. Ya ce gina rijiyoyin burtsatse a waɗannan yankuna zai yi matuƙar amfani, kasancewar ana samun ruwa ne a tsawon mita 90 a irin waɗannan yankuna.
Gwamna Namadi ya bayyana muhimmancin kula da kare muhalli. Don haka ya buƙaci a samar da hanyoyin rage gurbata muhalli, kamar samar da fitilun haskaka titi masu amfani da hasken rana, musamman a makarantu da sauran sassan jihar.
Ya bayyana buƙatar bayar da kula ta musamman ga ƙoramu da magudanun ruwa. Don haka ya ba da shawarar a riƙa yashe ƙoramu da koguna a kan kari domin sauƙaƙa gudanuwar ruwa. Ya roƙi wannan hukuma da ta sanar da gwamnati muhimmancin wannan, domin ɗaukar matakan da suka dace.
Da yake maida jawabi, Daraktan Hukumar ta National Agency for Great Green Wall (NAGGW), Dokta Maina ya gode wa Gwamnan saboda wannan ziyara. Ya ce lallai Jihar Jigawa na ɗaya daga cikin Jihohin da hukumar tasu za ta ba muhimmanci, musamman saboda babban ƙalubalen da suke fuskanta na ambaliya da kwararowar hamada. Ya ce hukumar za ta yi aikin haɗin gwiwa da jihar domin magance matsalolin, musamman wajen samar da shawarwari daga ƙwararru da tallafi ga yankunan da gwamnan ya zayyana.
Gwamnan na Jigawa ya yi godiya bisa ga kyakkyawar tarba da ya samu. Ya ce babu shakka idan aka samu haɗin gwiwa kuma aka yi aiki tare, hukumar za ta samu nasara sosai, wajen kare muhalli, bunƙasa noma da inganta rayuwar al’ummar jihar ta Jigawa.
