Daga Gizago
Malam M.K. Adam Gombe, shi ne Tauraron Gizagawa a wannan lokaci. Shi ne mai Lambar Gizago GZG-027- GMB.
Wane Ne M.K. Adam Gombe?
Sunansa Muhammad Kabir Adamu. An haife shi a garin Kumo, Ƙaramar Hukumar Akko da ke Jihar Gombe, shekaru hamsin da suka gabata.
Ya yi karatun Islamiyya da na Boko. A halin yanzu yana kasuwanci ne, kamar kuma yadda yake sana’ar noma da kiwon kaji da sauran tsuntsaye. A cikin Jihar Gombe yake zaune kuma a nan yake sana’arsa.
Matsayinsa A Ƙungiyar Gizago:
Malam M.K. na ɗaya daga cikin mutane na farko da suka kasance cikin Gizagawan Zumunci. Hasali ma, yana daga cikin mutane uku na farko da suka ba da shawarar kafa wannan ƙungiya
Jajirtacce shi a dukkan lamuran Gizagawa. Dalili ke nan ma ake kiran shi da laƙanin Agogo Sarkin Aiki. Shi ne ma Sakataren ƙungiyar na farko a lokacin da aka kafa ta. A yau kuwa shi ne Shugaban ƙungiyar na ƙasa. A yau ya shafe sama da shekara 6 yana jagorancin Gizagawa.
Ra’ayinsa Game Da Zumunci:
“Gaskiya sai dai in ce Alhamdulillah! An yi zumunci, an haɗa zumunci kuma ana kan zumunci, za kuma a ci gaba da zumunci har zuwa ƙarshen iya wa’adin rayuwata. Fatana Allah Ya karɓa mana, Ya tara mu a ladan baki ɗaya.”
Tsokacinsa Game Da Gizago:
“Wai! Wannan amsar ai ba za ta ɗauki wannan filin ba, sai dai na taƙaita bayani. A yanzu dangi na kusa da na nesa, da sun ji na ce ba na gari, mafi akasari cewa suke ka tafi aikin Gizagon naku ne? Ka ga ke nan wannan yana nufin Gizago ta shiga lungu da saƙo na ‘yan uwana da abokaina. Akwai ma waɗanda suke kira na da Gizago.
“A ɓangaren ita kanta Ƙungiyar Gizago kuma, babu abin da zan ce sai son barka, domin idan na ɗaga waya na ce ga abin da za a yi mini a jihohin Arewa da wasu daga cikin jihohin Kudancin ƙasar nan, babu ɓata lokaci ake aiwatar mini da shi. Wannan na samuwa ne duk albakacin wannan ƙungiyar.”
Shawara 5 Ga Gizagawa:
1-Ku kasance masu yi don Allah.
2-Ku riƙa kyautata zato a junanku.
3-Ku zamo masu haƙuri.
4-Ku riƙe zumunci da kyau.
5-Ku za mo masu juriya da dauriya, domin duk abin da za a yi sai an daure an jure. Wannan shi ne dalilin da ya kai mu sama da shekaru 15 muna tare cikin zumunci.
Masha Allah Allah Ya karawa wannan kafa albarka
Madalla da Shugaban Gizagawa. Agogo Sarkin Aiki. Allah ƙara zumunci.