Daga Gizago
Na daɗe ina son ki ɗauki wani tsari na zama a Soshalmediya, ki fahimci matsayinka da ƙimarki, ki saita al’amuranki yadda za su dace da ƙimarki. Bari in ba ki wasu ‘yan shawarwari, idan kika bi su, in sha Allah ba za ki yi da na sani ba.
1-Ko kin lura da cewa mafi yawan masu kawo maki raini, ba ‘yan ajinki ba ne? Mafi yawan su ba su kai darajar ‘yan aikinki ba. To saboda me za ki tsaya tanki-in-tanka da irin waɗannan?
2-A rayuwa irin ta zamanin yau, ki fuskanci lamuran gabanki kawai ba tare da kula shashashai ba. Ya kamata ki ɗauki misali da rayuwar KARE. Idan kina tafiya sai kare ya riƙa bin ki da haushi, me ya kamata ki yi domin maganinsa? Za ki bi shi da jifa ko kuma ki taya shi haushi? Abin da ya kamata ki yi shi ne, ki yi banza da shi, ki ci gaba da tafiya. Shi da kansa dole zai bar haushin, ke kuma ki isa inda kika nufa. Amma idan kika tsaya jifan sa, za ki ɓata lokacinki a banza, kuma ki zama abin kallo ga jama’a, saboda kin biye wa kare.
3-Masu iya magana sun ce SAI AN KULA KASHI YAKE ƊOYI. Misali kina tsakar tafiya a titi, sai ki wuce ta wurin kashi, ƙuda na bibiyar shi, idan kika tsaya kore wa kashin ƙudaje, zan ishe ki da ɗoyi. Kamar haka ne a nan soshalmediya, idan kika biye wa shashashai, kamar kin biye wa kashi ne, ɗoyi zai dame ki har wasu su riƙa jin ƙyamar ki.
4-Wani mai azancin magana ya ce: “Never argue with a fool, people may never spot the difference. Idan kina biye faɗa da irin waɗannan a soshalmediya, kina ƙara masu ƙima da suna ne. Babu wanda ya san su, amma ke an san ki, don haka sai ki haskaka su. Da ma abin da suke nema ke nan, su yi suna.
5-Hajiya, ki koyi share su daga duniyarki. A duk lokacin da wani ya tsokane ki. KI YI KAMAR MA ALLAH BAI HALICCE SHI BA. Ki yi kunnen shegu da shi. Haka zai gaji ya bari!
Allah kare mu daga masu son taɓa mutuncinmu, Amin.
