Kotu Ta Tsare Malamin Jami’a Bisa Zargin Danganta Kamfanin Rufaida Yoghurt Da Malami
Daga Wakilinmu
___________
Wata Kotun Majistare da ke zamanta a Unguwar Nomansland, a Jihar Kano, ta bayar da umarnin tsare wani malamin jami’a mai suna Sanusi Sulaiman, bisa zargin ɓata sunan mamallakin Kamfanin Rufaida Yoghurt.
Kamar yadda jaridar Daily Trust ta ruwaito, an gurfanar da mutumin ake ƙara a gaban kotun da ke ƙarƙashin jagorancin Mai Shari’a Alkassim Nasif Danfillo, bisa wasu tuhume-tuhume da suka haɗa da ɓata suna, tunzura jama’a da haddasa tashin hankali da kuma yaɗa bayanan da za su iya haifar da illa.
A lokacin da aka karanta masa tuhume-tuhumen, da farko ya bayar da amsa amma daga baya lauyansa ya ja hankalin kotun cewa wanda ake ƙarar bai fahimci tuhume-tuhumen da ake yi masa ba. Hakan ya sa aka sake ba shi damar amsawa, inda ya musanta aikata laifukan da ake zarginsa da su.
Lauyan masu gabatar da ƙara ya nemi a ɗage sauraron shari’ar, domin ba su damar gabatar da shaidu, yayin da lauyan wanda ake ƙara ya shigar da buƙatar neman belinsa.
Daga bisani, kotun ta ɗage shari’ar zuwa jibi Juma’a, domin sauraron buƙatar neman belin wanda ake ƙara.
Ana zargin wanda ake ƙarar da cewa, ya riƙa yaɗa bayanan da ke danganta masana’antun Rufaida Yoghurt da ke sassa daban-daban na ƙasar nan da tsohon Ministan Shari’a, Abubakar Malami, inda yake iƙirarin cewa kuɗaɗen da tsohon Ministan ya kashe, ana karkatar da su ne zuwa cikin kamfanin.
A martaninsa kan waɗannan zarge-zarge, mamallakin kamfanin Rufaida Yoghurt ya buƙaci al’umma, musamman waɗanda ke da irin wannan fahimta, da su guji yaɗa irin waɗannan bayanai. Ya jaddada cewa kamfanin nasa ne, ba na wani tsohon Minista ba.
Ya kuma yi gargaɗin cewa duk wanda ya bi sahun wanda ake ƙarar wajen yaɗa irin waɗannan bayanai, zai fuskanci hukunci bisa tanadin doka.
___________













