BAKIN JAƁA (6)
(Labarin Cin Amana)
Daga Bashir Yahuza Malumfashi
_______________
Haka dai Jummalo ta ci gaba da zama a gidansu, ita da mahaifiyarta duk suna zaman jawarci, kodayake ita tana ɗauke da ciki, haihuwa ko yau ko gobe. Ita kuwa mahaifiyar, tana aikin koyarwa ne a makarantar firamare ta unguwarsu.
A haka lokacin haihuwarta ya yi. Nan ma sai da aka samu taƙaddama tsakaninta da tsohon mijin nata. Lokacin da alamun maƙuda suka bayyana, sai mahaifiyarta ta aika wa surukanta da saƙo, cewa suna neman Naira miliyan biyar domin zuwa asibiti. Su kuma suka ce ba za su bayar da ko kwabo ba, illa iyaka za su kai ta asibitin da iyalinsu suke zuwa. Asibiti ne mai zaman kansa, kuma an shaida cewa ba ƙaramin asibiti ba ne.
Haka aka yi ta kai ruwa rana, daga ƙarshe dai a kan dole suka haƙura, suka amince ta je wannan asibiti. Wani abin ikon Allah ma, ko da aka kwantar da ita a gadon jinya, ko awa biyu ba ta yi ba ta haihu. Ta haifi namiji.
Jummalo da mahaifiyarta, ganin cewa ba su yi nasarar tatsar kuɗi masu yawa ba a yayin zaman jego, sai kuma suka ƙara shirya wata yaudara. Sun yanke cewa ba za ta shayar da jaririn ba, sai an ba ta kuɗin shayarwa. Al’amari ya yi ƙamari, har sai da aka zauna gaban alƙali.
Mahaifin Jummalo ya yi matuƙar baƙin ciki da wannan mataki da suka ɗauka. Gari ya ɗauka da ɗumi yadda ɗiyarsa ta zubar masa da mutunci. Lamarin ya zama abin tattaunawa a majalisu. Haka ma abin ya kasance a tsakanin mata, a gidajen biki ko suna. Masu zunɗe suna yi, masu shaguɓe ma suna nasu aiki.
Kafin a yi zaman kotu na ƙarshe, Jummalo ta nemi a riƙa ba ta Naira dubu ɗari biyar duk wata, a matsayin kuɗin shayarwa. Daga ƙarshe dai aka daidaita, cewa Mamman zai riƙa ba ta Naira dubu ɗari biyu duk wata.
“To, kuma za a ƙirga tun daga watan da na haihu, a biya ni.” In ji Jummalo, tana magana a gaban alƙali.
Jin wannan batu, sai alƙali ya daka mata tsawa. “Ke wace irin shashasha ce?”
Nan da nan Jummalo ta zuciya, ta turɓune baki tana ƙunƙunai. Alƙalin kuwa ya lura da haka. Nan da nan ya umurci ɗan sanda da ya kai ta ajiya gidan yari. Daga bisani kuma ya ba masinja takardar sammaci, a kai wa mahaifinta.
Wanshekare aka sake hallara a gaban kotu, Alƙali bai zauna a zauren kotu ba, a ofishinsa ya zauna da su. Ya aika an kawo Jummalo daga gidan yari, har da mahaifinta da mahaifiyarta sun hallara, a gefe ɗaya kuma ga Mamman Big Boy.
“Kai ne mahaifin yarinyar nan ko?” Alƙali ya tambayi babanta. Bai jira ya amsa ba sai ya ci gaba da magana. “Ko kaɗan ban ji daɗin irin tarbiyyar da ka ba ta ba. Ba ta da kunya ko kaɗan…”
Koda mahaifin Jummalo ya ji rashin kunyar da ɗiyarsa ta yi wa alƙali, bai san lokacin da hawayen takaici ya fara zuba daga idanunsa ba. “Ke dai Allah wadaran halinki.”
A haka ne ya roƙi Alƙali aka kashe maganar, tare da sharaɗin cewa Naira dubu 200 za a riƙa ba ta, a matsayin kuɗin shayarwa.
An samu tsawon wata uku Mamman yana biyan wannan adadin kuɗi. A wata na huɗu sai aka samu akasi bai kai mata kuɗin ba kan lokaci. Jinkirin kwana biyar aka samu, domin ya yi tafiya wani gari. Jummalo ta neme shi a waya ba ta samu ba. Ai kuwa ba ta yi shawara da kowa ba, sai ta haɗa akwatin yaron da kayansa, ta ɗauke shi ta kai ƙofar gidan tsohon mijin nata ta kwantar da shi. Yana tsaga kuka, haka ta juya baya ta bar shi yana ta wutsul-wutsul da ƙafafu.
Dayake gidan Mamman daban yake, nesa kaɗan da gidan iyayensa , babu wanda ya ankara da wannan ɗanyen aiki, kasancewar babu motsin mutane a wurin.
Sai da aka ɗauki kimanin awa uku da faruwar lamarin sannan Jummalo ta aika wa Mamman tes. “Ba na buƙatar kuɗinka na shayarwa, ka riƙe abinka. Kuma daga yau na daina shayar da yaronka. A yanzu haka ma yana can ƙofar gidanka. Idan kana buƙatarsa ka je ka ɗauki kayanka.”
Koda Mamman ya karanta wannan saƙo sai ya kiɗime. Nan take kuwa ya amince da cewa za ta iya wannan shirmen, musamman ya yi zargin cewa ta sha ƙwaya. Hakan ya sa nan da nan ya sanar da mahaifiyarsa abin da ake ciki.
Koda aka je ƙofar gidan Mamman, an samu jariri ya ci kuka har ya daina don ƙashin kansa. Ya saka yatsa a baki yana tsotsa amma duk ya galabaita. Koda aka kai shi asibiti, kafin ma a fara yi masa magani ya ce ga garinku nan. Ya m+tu.
(Za Mu Ci Gaba)
_______________
