An Karrama Ɗanmadamin Yusufari Da Kambin Yabo Da Girmamawa
~~~~~~~
A jiya Lahadi, kamfanin mujallar ‘Our Nigeria News Magazine’ ya gudanar da bikin karrama fitattun mutane da suke wa al’umma hidima, ciki har da fitaccen matashi mai taimaka wa matasa, Injiniya Hassan Mohammed da Kambin Girmamawa.
Injiniya Hassan, wanda shi ne Ɗanmadamin Yusufari, an karrama shi ne da Kambin General Excellence Award on Youth Development, bisa la’akari da himmarsa da ƙoƙarinsa wajen tallafa wa matasa da kuma yadda yake taimako wajen samar da zaman lafiya ga al’umma.
Haka kuma, a yayin bikin, an zaƙulo wasu fitattun mutane da suke taimakon al’umma a fannoni da dama, su ma aka karrama su. Cikin mutanen da aka karrama sun haɗa da mai martaba Oba (Dr). Hammed Adekunle Makama, CON, Teghosun III, Olowu na Masarautar Owu-Kuta da mai martaba Dr. Abubakar Ali da mai girma Alabo Emeritus da Manjo-Janar Victor Okwudili Ezegwu (mai ritaya) da Dr. Maryam Yunusa Danjaki.
A yayin bikin karramawar, wanda ya gudana a Babban Zauren Taro Na Ƙasa-da-Ƙasa da ke Abuja, Mai girma Ambassada, Dokta, Laftanar-Janar Tukur Yusufu Buratai, CFR, wanda kuma shi ne Betaran Biu kuma Garkuwan Keffi, Sadaukin Ƙauran Namoda, Jagomolu na Shakiland, Ƙauran Gusau, Jarman Maradun kuma Birman ba Bwari, Magayaƙin Ƙasar Hausa, shi ne Babban Baƙo da ya jagoranci taron daga farko har ƙarshe.
Wasu daga manyan baƙi a yayin bikin sun haɗa da Riya Admiral Adamu Biu da Dr. Babangida Aliyu da Farfesa Barnabas Ekpo da Dr. Bassey Omini da Zack Orji da Dr. Abubakar Muhammad Sani da Maryam Umar Gombe da sauransu da dama.
~~~~~~~
