Betaran Biu Janar Tukur Yusuf Buratai Ya Samu Sarautar ‘Baakoren Akure’
Daga Anas Saminu Ja’en
~~~~~~~
A ranar Asabar 14 ga watan Oktoba, 2023 ce aka naɗa Janar Tukur Yusufu Buratai, CFR Sarautar ‘Baakoren Akure.
An gudanar da bikin naɗin ne a yayin babban bikin al’ada na shekara-shekara mai taken “Ulefunta Festival” na 2023 da aka saba yi a garin Akure.
Laftanar-Janar Tukur (mai ritaya), shi ne tsohon Babban Hafsan Hafsoshin Sojojin Najeriya. Shi ne Betaran Biu kuma Garkuwan Keffi, haka kuma tsohon Jakadan Najeriya a Jamhuriyar Benin.
Mai Martaba Sarkin masarautar Akure, Oba (Dokta) Aladetoyinbo Ogunlade Aladelusi, CFR Odundun II, Deji ne ya yi ba shi wannan muhimmiyar sarauta ta ‘Baakoren Akure’ kuma aka naɗa shi, a yayin ruguntsumin bikin.
Kamar yadda Masarautar Akure ta bayyana, a yayin naɗin nasa, “an ba ka wannan sarauta ta ‘Baakoren Akure’ bisa la’akari da irin ƙoƙarinka da jajircewarka, a lokacin da kake shugabancin sojojin Najeriya da kuma yadda ka riƙe Jakadan Najeriya a Jamhuriyar Benin.”
Ɗaya daga cikin ayarin Janar Buratai da suka halarci bikin naɗin, Ibrahim Dahiru Ɗanfulani, ya ce wani mai wasan al’adun gargajiya a Akure’, mai suna Taye Jonson ya bayyana farin cikinsa da wannan karramawa da aka yi wa Buratai da aka naɗa shi Sarautar ‘Baakoren Akure.
Ya ce haƙiƙa girmamawa ce ga ita kanta Masarautar Akure, da ta samu mutum kamar Buratai a cikinta, a matsayinsa na wanda ya sadaukar da rayuwarsa wajan bai wa ƙasa gudummawa a lokacin da yake jagorancin rundunar sojojin Najeriya. Ya ƙara da cewa ya cancanta da wannan sarauta, duba da irin ayyukan da ya gabatar wa al’umma.
Kazalika, Ita ma, Alaja Fatimo Abdulraheem, wacce babbar ‘yar kasuwa ce, ta nuna jin daɗi bisa yadda masarautar ta ba shi wannan sarauta. Haka kuma ta buƙaci Sarkin Akure da ya ci gaba da zaɓo mutane nagartattu irin Buratai zuwa cikin masarautarsu saboda irin gudummawar da za su bayar wajan ci gaban masarautar.
A lokacin gudanar da wannan biki na naɗi, Oba Aladelusi ya ƙara ƙarfafa gwiwar Buratai, inda ya shaida masa cewa wannan sarauta ta ‘Baakoren Akure’ wata kyauta ce ta karramawa daga masarautar tasu. “Saboda haka ne muka naɗa ka, domin bayar da misali da kai, a matsayinka na ɗan ƙasa nagari; wanda ya yi wa ƙasarsa hidima. Haka kuma mun san za ka yi ƙoƙari a wannan masarautata, a matsayinka na Baakoren Akure.”
A yayin da yake gabatar da nasa jawabin, Ambasada Buratai ya bayyana farin cikinsa bisa wannan girmamawa da aka yi masa na naɗa shi a Sarautar ‘Baakoren Akure.’ Sannan ya sake bayyana godiyarsa bisa irin karɓar da aka yi masa da godiya da irin karamcin da mutanan gari suka yi masa wajan ba shi wannan matsayi. Ya kuma tabbatar musu cewa ba za su yi nadama ba da suka ba shi wannan sarauta.
Ita dai wannan sarauta ta ‘Baakoren Akure’ a al’adance tana nufin wani mutum mai samar da ci gaba ta fannin noma da samar da abinci da tsaro ga al’ummar Akure.
Bikin naɗin dai ya gudana cikin nasara kuma ya samu halartar manyan mutane da suka ya haɗa da mayan ma’aikatan gwamnati da masu masana’antu da masu riƙe da sarautun gargajiya da tsofaffin jami’an tsaron soji da ‘yan uwa da abokan arziki.
~~~~~~~
