Mu Ji Tsoron Allah
__________
‘Yan uwa, ina yi maku sallama irin ta Musulunci, Assalamu alaikum warahmatullahi wabarakatuhu. Yau Allah ya nuna mana ranar Juma’a ta ƙarshe a watan Shawwal na bana. Bari mu yi wa juna nasiha:
‘Yan uwa, ko muna lura da yadda duniya take ta gudu? To ba duniyar ce kaɗai take shuɗewa ba, rayukanmu ne suke ta tafiya. Jama’a, lallai ne mu ji tsoron Allah.
Tsoron Allah shi ne babban ginshiƙin kyakkyawar rayuwa kuma shi ne babban makamin da zai cece mu daga musibar duniya da lahira.
Allah (swt) a cikin Alƙur’aninsa mai girma, a Suratu Hujurat 49:13, yana cewa: “Mafi daraja a wurin Allah shi ne mafi tsoronsa.” Haka kuma a Hadisin Imam Muslim mai lamba 2564, Manzon Allah (saw) ya bayyana cewa “Allah ba ya kallon surarku…”
Tsoron Allah dai ba a sutura ko sura yake ba, yana nan a cikin zuciya. Duk abin da za mu aikata, mu tuna da cewa Allah yana kallonmu, domin idan mu ba mu ganinsa, to shi yana ganinmu kuma zai yi mana hisabi.
Ya Allah ka sanya mu cikin bayinka masu biyayya ga shari’arka. Allah ka sanya mu wanye da duniyar nan lafiya. Mu iske ka muna masu rabo da arziƙinka marar iyaka. Amin-Summa-Amin.
__________
