FITILAR MATASA – Zannan Galadima (1)
Shawarwarin Ƙarfafa Matasa Daga Rayuwar Dr. Tukur Tingilin
Na Bashir Yahuza Malumfashi
______________
GABATARWA
Da sunan Allah mai rahama, mai jin ƙai. Sallama da Salati ga fiyauyyen talikai, Manzon Tsira, Jagoran Jagorori, Hasken-Haske, mai haskakawa a kowane zamani, Manzon Allah Muhammadu (saw) da alayensa da sahabbansa da dukkan waɗanda suka biyo bayansu da imani da kyautatawa har zuwa ƙarshen duniya.
Bayan haka, wannan littafi mai suna da taken: Fitilar Matasa: Zannan Galadima… yunƙuri ne na sassaita ɗabi’u da halayen matasanmu na yau, domin su zama nagartattu, masu amfani ga kansu da kuma al’umma baki ɗaya. Ƙunshe yake da shawarwari da dabaru da hikimomi da falsafar rayuwa, domin su zama jagora ga al’ummarmu, musamman ma matasa da ke da ƙishirwar haka.
A matsayin babban jigo, an ɗora rayuwar haziƙi kuma jajirtaccen matashi – Dokta, Injiniya Tukur Hassan Tingilin (Zannan Galadiman Katsina, Walin Ƙafur, Cigarin Danejin Katsina) – a matsayin madubi, abin koyi ga matasan da suke ƙishirwar jagora na kirki; ta yadda za su ɗauki misali, su kwaikwayi kyawawan hanyoyin da ya bi, har ya samu nasara a rayuwa.
Ina roƙon Allah ya sanya albarka a wannan littafi, domin ya zama ya cin ma nasarar ilimantarwa da faɗakarwa ga al’umma, musamman matasanmu na yau da ma masu zuwa nan gaba. Allah ya sa mu dace.
Amin-Summa-Amin.
Bashir Yahuza Malumfashi, Fasihin Galadiman Katsina, Babban Editan Mujallar Taskar Gizago (online).
