SHEIKH ƊAHIRU BAUCHI YA CIKA SHEKARA 100 CIF A DUNIYA
A ranar Talata, 02 ga Muharram, 1446 (Hijriyya) wadda ta yi daidai da 08 ga Yuli, 2024 (Miladiyya), shahararren malamin Musulunci kuma jigo a Ɗariƙar Tijjaniyya, Sheikh Ɗahiru Usman Bauchi ya cika shekara 100 cur a duniya.
Kamar yadda marubucin littafin tarihinsa, Farfesa Khalid Abdullahi Zaria ya bayyana a shafinsa na kafar sada zumunta na Facebook, an haifi fitaccen malamin ne a ranar Laraba, 02 ga Muharram, 1346 (Hijriyya), saboda haka ta tabbata yau Talata, 02 ga Muharram, 1446 (Hijriyya) ya cika shekara 100 daidai a duniya.
Babban malamin, wanda masanin Ƙur’ani ne na gaske, ya shafe shekaru 75 yana gudanar da Tafsirin Alƙur’ani mai girma – littafin da Allah Yake son a raya ambatonSa da shi.
A tsawon waɗannan shekaru masu albarka, Sheikh Ɗahiru ya yaye ɗalibai kimanin dubu 100, waɗanda suka haddace Alkur’ani mai girma.
Muna roƙo ga Allah maɗaukakin Sarki da Ya ƙara wa Annabi Muhammadu (saw) daraja, Ya kuma ƙara wa Shaikh Ɗahiru Usman Bauchi lafiya da imani, Ya sanya Alkur’ani ya cece shi, a matsayinsa na khadiminsa.
Amin Ya Allah.
