SATAR AZZAKARI: Gaskiya Ko Ruɗanin Tunani?
Daga Musa A. Bello
~~~~~~~
Mutane da yawa ba su san TUNANI na da alaƙa da WARKEWA a yayin rashin lafiya ba. Yadda mutum ya sa a ransa yana tasiri wajen aiki.
Shi ya sa ko ruwa ka ɗiba ka ba wani, ka ce masa wani magani ne na musamman da zai taimaka masa wajen warkewa daga wata matsala, sannan ka tabbatar masa da cewa wasu ma sun yi amfani da shi sun dace. To fa in ya sha, sai ya ji alamun fa haka ne, maganin na aiki.
Wannan shi ke tabbatar da irin tasiri da ƙarfin da TUNANI ke da shi ke nan.
Hakazalika, SHA’AWA (Sexual Arousal) ta kwanciyar aure, tana da alaƙa da TUNANIN ZUCIYA (Mind). Shi ya sa namiji ko tunanin matarsa ya yi a wani yanayi, sai ya ji al’aurarsa ta amsa, duk da cewa ba ya ganin ta a lokacin.
Ita matsalar da ɗa namiji zai ji ba ya jin al’aurarsa, ita ake kira da “KORO SYNDROME.” Matsala ce da take da alaƙa da ƙwaƙwalwa ko tunani. Mutum zai ji kamar azzakarinsa na zuƙewa cikin jikinsa ne, wanda hakan zai tada masa hankali.
A ɓangaren mata kuma, za ta ji kamar kan mamanta ko leɓen al’aurarta yana noƙewa ciki.
Duniyar ilimi ta tabbatar da cewa wannan al’amari, matsala ce ta Ƙwaƙwalwa ko Tunani (Psychiatry Disorder), wanda yake samo asali daga mabanbantan dalilai kamar haka:
✓ Yawan tunani a kan girman azzakarin mutum.
Zan iya cewa mutanen da suke yawan yi mani tambaya a kan yadda za su ƙara girman azzakarinsu, sun fi masu tambaya a kan yaya za su yi ƙiba. Hakan ya nuna mutane da yawa sun damu da tunanin ƙara girman azzakari, wanda duniyar ilimi ta tabbatar da babu abin da zai ƙara maka girmansa, in ba aiki na musamman ba (surgery).
Azzakari na iya girma iya ƙarshen girmansa yayin sha’awa amma ba zai wuce ainihin girmansa na asalin halitta ba.
Saboda mutane sun sa wa kansu tunanin ƙanƙancewar gaba, shi ya sa kullum masu maganin gargajiya suke ciniki sosai. In ka gaya wa mutum cewa ba wata matsala game da girman azzakarinsa, sai ya ga kamar kana yi masa baƙin cikin samun ƙatoton kayan aiki ne, duk da cewa shi girman azzakari ba shi da alaƙa da farin cikin da mutum zai ji ko ya bayar.
✓ Yarda Da Cewa An Masa Sihiri.
Mutum na fara tunanin cewa wanda fa ya goge shi yanzun nan, ɗan shafi mulera ne. Nan fa ƙwaƙwalwarsa za ta fara raya masa cewa azzakarinsa fa ya ɓace, wanda a zahiri ba haka ba ne.
✓Yawan Istimna’i.
Wannan shi ne mutum ya riƙa wasa da azzakarinsa da kansa, wanda ake kira *Masturbation.” Wannan shi ma yana haifar da irin wannan tunanin.
✓ Tunanin Cewa Dole Azzakari Sai Ya Kai Inci Sha Biyar.
Kamar yadda ake faɗa a wasu littattafan soyayya na ƙarya (novel), wannan yaudarar kai ce. Duniyar ilimi ta tabbatar da cewa mafi yawancin mutane, azzakarinsu bai wuce inci 5 ko 6. Masu inci 15 a duniya tsiraru ne.
Yayin da mutum ke yawan tunani kan haka, zai raina azzakarinsa, wanda hakan na iya haifar da “Koro Syndrome.”
Wallahi ƘARYA ne, ba wanda ya isa ya sace maka AZZAKARI. Sai dai in wuƙa ya sa ya yanke.
Wasu na nuna bidiyo na wasu da suka ce sun sace wa wani azzakari amma ko a bidiyon za ka gane tabbas KORO SYNDROME ne ya kama wanda aka ce an sace ma wa.
~~~~~~~
Pherm. Musa A. Bello, masani ne kuma ƙwararre a ilimin haɗa magunguna na zamani.
~~~~~~~
