An Samu Sauƙin Matsalar Tsaro: Yanzu Dukkan Kasuwanninmu Suna Ci – Gwamna Radda
Daga Bashir Yahuza Malumfashi
__________
Gwamnan Jihar Katsina, Malam Dikko Umaru Raɗɗa, ya bayyana cewa a halin yanzu babu wata kasuwa da aka rufe a faɗin ƙananan hukumomi 34 na jihar, yana mai cewa dukkanin kasuwanni suna buɗe tare da ci gaba da gudanar da harkokin kasuwanci da sauran ayyukan tattalin arziƙi.
Gwamnan ya bayyana hakan ne yayin wata ganawa da shugabannin ƙungiyoyin ’yan kasuwa da shugabannin ‘yan kasuwa daga ƙananan hukumomin jihar 34, ƙarƙashin jagorancin Shugaban Hukumar Tara Haraji ta Jihar Katsina, Alhaji Aminu Isyaku.
A cewar Gwamna Raɗɗa, wannan ci gaba na da nasaba da ingantuwar yanayin tsaro da aka samu a jihar, wanda ya ba ’yan kasuwa damar komawa kasuwanninsu tare da gudanar da harkokinsu cikin yanayi mai kyau, idan aka kwatanta da shekarun baya.
Ya ce, duk da cewa har yanzu akwai sauran ƙalubalen tsaro da ake fuskanta, an samu gagarumin sauyi idan aka kwatanta da baya, lokacin da matsalar tsaro ta tilasta rufe sama da kasuwanni takwas a hukumance a wasu sassan jihar.
Gwamnan ya jaddada cewa kasuwanni na taka muhimmiyar rawa wajen bunƙasa tattalin arziƙin jihar, samar da guraben ayyukan yi, ƙara yawan kuɗaɗen shiga da kuma inganta rayuwar jama’a. Saboda haka, ya buƙaci shugabannin kasuwanni da ’yan kasuwa su ci gaba da ba gwamnati haɗin kai wajen tabbatar da dorewar wannan yanayi.
A nasa jawabin, Shugaban Hukumar Tara Haraji ta Jihar Katsina, Alhaji Aminu Isyaku, ya bayyana cewa haɗin gwiwar da hukumar ke yi da ƙungiyoyin ’yan kasuwa, ya taimaka matuƙa wajen inganta tsarin karɓar haraji, musamman daga ɓangaren tattalin arziƙin da ba na hukuma ba.
Ya ce wannan haɗin kai ya taimaka wa gwamnatin jihar wajen cin ma wasu daga cikin manufofinta na tara kuɗaɗen shiga cikin gida a cikin shekaru uku da suka gabata, tare da samar da kyakkyawar fahimta tsakanin gwamnati da ’yan kasuwa.
Shugabannin kasuwannin daga ƙananan hukumomi 34 na jihar, sun yaba wa Gwamna Radda bisa abin da suka bayyana a matsayin kyakkyawan jagoranci da ƙoƙarin da yake yi wajen samar da yanayi mai kyau ga harkokin kasuwanci. Sun kuma yi alkawarin ci gaba da ba gwamnati haɗin kai wajen inganta tsarin tara kuɗaɗen shiga da bunƙasa tattalin arziƙin jihar.
Sun kuma yaba da ayyukan raya kasuwanni da gwamnatin jihar ta aiwatar, musamman gina sabbin kasuwanni na zamani a Mashi, Daura da Charanci da kuma sauran wuraren da gwamnati ke shirin fara irin waɗannan ayyuka.
Da yake mayar da martani, Gwamna Raɗɗa ya gode wa shugabannin kasuwannin bisa gudunmawar da suke bayarwa wajen ci gaban tattalin arziƙin Katsina, tare da jaddada cewa haɗin kan gwamnati da ’yan kasuwa na da matuƙar muhimmanci wajen samar da tattalin arziƙi mai ɗorewa.
Ya kuma buƙaci shugabannin kasuwanni da su tabbatar da bin ƙa’idojin kasuwanci, taimakawa wajen inganta tsaro da kuma ci gaba da tallafa wa manufofin gwamnati da nufin samar da kyakkyawan yanayi ga harkokin kasuwanci a faɗin jihar.
Gwamnan ya ce gwamnatin jihar za ta ci gaba da mayar da hankali wajen inganta tsaro da abubuwan more rayuwa a kasuwanni, domin ƙara ƙarfafa harkokin kasuwanci da samar da yanayi da zai ba ’yan kasuwa da masu zuba jari damar gudanar da harkokinsu cikin kwanciyar hankali.
__________
