Kada Ka Karaya Da Rayuwa
Daga Bashir Yahuza Malumfashi
Related posts
•••••••
Sallama da aminci da fatan alheri ga ‘yan uwa. A ci gaba da zizara mana sinadaran yauƙaƙa rayuwa, maudu’inmu na yau yana mana ishara ne game da ita kanta rayuwa – cewa ita ƙalubale ce kuma ba a karaya da ita, muddin dai ana son a cin ma nasara.
Ɗan uwa, ‘yar uwa, ko kun san cewa rayuwarmu tana cike da ƙalubale? Babu shakka, rayuwarmu ba aljanna ba ce. Rayuwa ce mai taken faɗuwa da tashi, hawa da sauka, nasara da asara, daɗi da wahala. Rayuwa ce ta dacewa, kamar kuma yadda take rayuwar nadama.
Ɗan uwa, ka taɓa shiga wani yanayi na ƙunci? ‘Yar uwa, ke ma ba za ki rasa shiga wani yanayi mara daɗi ba a rayuwarki. Wataƙila kin taɓa fuskantar rabuwa da miji ko masoyi. Wataƙila kin taɓa samun faɗuwa a harkar kasuwanci ko kuma kika rasa aikinki a wata ma’aikata ko hukumar gwamnati.
Ɗan uwa, shin kai ɗalibi ne? Wataƙila ka taɓa faɗuwa jarabawa, ko kuma an taɓa korar ka ma gaba ɗaya daga makarantar saboda wani dalili. Kada ka saduda, ka ce shi ke nan rayuwarka ta neman ilimi ta ƙare. A’a, ba ta ƙare ba. A lokacin da ka faɗi jarabawa ko kuma a wani dalili aka kore ka daga makaranta, me ya kamata ka yi?
Maimakon ka shiga alhini da takaici, wuri za ka samu ka zauna, ka shiga nazarin abin da ya kai kuma ya komo, har wannan al’amari ya faru. Ka faɗi jarabawa, to me ya sa ka faɗi? Ka fara tunanin abin da ya haddasa faɗuwar taka, alhali sauran ɗalibai da dama sun cinye, wasu ma har da yabo. Watakila ba ka yi karatu da nazarin darussan da aka koya maka ba. Wataƙila ma tun da farko ba ka fahimci darussan ba ko kuma ka tsaya wasa da sauran shugulan da suka kawar da hankalinka ga karatu. Idan ka gano dalilin, sai ka kakkaɓe rigarka, ka ɗauki aniyar gyara kuskurenka, domin gaba.
Haka lamarin yake ga dukkan sassan rayuwa. A duk lokacin da ka kasa cin ma biyan wata buƙata ta rayuwa, akwai dalilin faruwar haka. Idan rayuwa ta kakkarya ka, hakan na nufin ka shirya a sake ɗora ka ta wata hanya daban. A matsayinka na ɗan kasuwa, a lokacin da ka kasa cin riba ko ka gamu da wata asara, lallai akwai dalili. Ka yi saurin binciko dalilin, kuma a nan maganinka yake.
Wataƙila ma ba ka san kan sana’ar ba tun da farko. Ka shiga harkar ce a ido rufe, ba tare da ka koya daga masananta ba. Don haka sai ka koma ka koye ta yadda ya dace, sannan ka ci gaba. Har kullum dai, ka koyi sana’a ko aiki, kafin ma ka fara. Amma lallai kada ka sake ka karaya.
A lokacin da ka fuskanci wata matsala ko wani ƙalubale, ka amince cewa a ɓangarorin da matsalar ta bayyana, ta haska maka wata sabuwar fahimta ce. A yayin da kika samu matsala da mijinki, har aurenku ya rabu. Da kin zauna kika nazarci yadda matsalar ta faru, nan da nan za ki samu waraka, domin gyaran irin wannan matsala a gaba.
A lokacin da wani dalili ya sanya aka kore ka daga wurin aikinka. Da zarar ka natsu, za ka gane dalilin faruwar haka. Ke nan sai ka ɗauki ɗamarar gyarawa don gaba. Nan gaba idan ka samu wani aikin, ba za ka sake maimaita wannan kuskuren ba, domin ka san abin da ya haifar maka a baya.
Abin fahimta dai shi ne, rayuwa na ɗauke da ƙalubale iri-iri. Don haka ka zama cikin shirin fuskantar kowane irin canji da ta bijiro maka da shi. Rayuwa, hagu ce da dama, sama ce da ƙasa, zafi ce da sanyi, inuwa ce da rana. A duk lokacin da ta bijiro maka da rana, maza ka nemi inuwa. Amma kada ka sake ka karaya da ita.
_______________
