FITILAR MATASA – Zannan Galadima (2)
BABI NA ƊAYA
__________
Wane Ne Matashi?
Shin wane ne matashi kuma wane matsayi ke gare shi ga al’umma? Yaya rayuwar matashi ta kamata ta kasance kuma ta yaya matashi zai inganta rayuwarsa domin ta zama mai amfani ga karan kansa da ma al’umma baki ɗaya? In sha Allahu, a wannan bunƙasasshen tsokaci, za mu yi ƙoƙarin tattauna waɗannan tambayoyi da ma wasunsu da dama. Babban burinmu a nan shi ne, domin a ilimantar, a fahimtar da matasanmu, su fahimci rayuwa kuma su zama tsayayyu da ƙafafunsu, domin fuskantar kowane irin ƙalubale.
Ya kamata matasa su fahimci cewa, duniya ta dafe ƙeyarta, tana famfalawa da gudu ba tare da waiwaye ba. Don haka ya zama wajibi mu tashi tsaye domin ganin mun samu rayuwa daidai da zamanin da duniya ta kawo mu. Idan ba mu shirya, mun tunkari tsari da yanayin da duniya ke tafiya ba, babu shakka za mu ci gaba da zama kurar-baya. Za mu zama an dankwafar da mu – wanda kuma ba haka ya kamata ba, wai ƙanin miji ya fi miji kyau!
Matashi, kana da buƙatar jagora, kana da buƙatar busta, kana da buƙatar fitila mai haska maka gaba, domin ka kai ga gaci a lamuranka na rayuwa. Kamar yadda aka ambata a yayin gabatarwa, mun zaɓi yin amfani da salo da tarihin rayuwar wannan bawan Allah, Injiniya, Dokta Tukur Hassan Tingulin, domin gabatar da wannan muhimmin aiki ga al’umma. Ba don komai ba sai domin tafiya cikin tunani da hikima da azamarsa. Yana daga cikin cikin burinsa da ƙudurinsa, ya ga al’umma ta bunƙasa, matasa sun samu abin yi kuma sun samu nasara a rayuwa.
Har ila yau, bari mu ƙara tambaya, shin wane ne matashi? Wannan tambayar tana da muhimmanci ga matasa da ma al’umma gaba ɗaya, domin sai ka san kanka sannan za ka san matsayinka da ƙimarka a cikin al’umma. Ga sauran al’umma kuwa, yana da kyau su san wane ne matashi kuma ta yaya za a mu’amalance shi, domin inganta al’umma gaba ɗaya?
Kamar yadda Ƙamus ɗin Oxford ya ce, matashi shi ne mutum (mace ko namiji) mai ƙuruciya, wanda ya kusa ko kuma ya balaga. Kundin Encyclopedia Americana kuwa cewa ya yi: Rayuwar Matashi (mace ko namiji), wani lokaci ne ko yanayi da yake shirya yara zuwa ga balaga, sannan su kai ga zama mutane, ta hanyar tsarabe-tsaraben rayuwa, ƙalubale ta fuskar zamantakewa, ɗabi’a da halayya da tohon jiki da na ƙwaƙwalwa.
Ita kuwa Ƙungiyar Haɓaka Ilimi, Zamantakewa da Al’adu ta Majalisar Ɗinkin Duniya (UNESCO) da Ƙungilar Ƙwadago ta Duniya sun bayyana cewa matashi (mace ko namiji) na kasancewa ne daga shekara 15 zuwa 24. Shi kuwa Asusun Tallafa wa Matasa na Majalisar Ɗinkin Duniya (UN Habitat – Youth Fund), cewa ya yi matashi na kasancewa ne daga shekara 15 zuwa 35. A yayin da ita ma Ƙungiyar Matasan Afirika (The African Youth Charter) ta jaddada cewa matshi na kasancewa ne daga shekara 15 zuwa 35. Akwai kuma masanan da ke nuna cewa matashi na kasancewa ne tun daga shekara 15 zuwa shekara 40.
Ya kai matashi, bisa ga waɗannan bayanai da suka gabata, lallai ne ka gane cewa ba ka da isasshen lokacin ɓatawa wajen wasa. Ka yi ƙoƙarin fuskantar rayuwa bisa fahimta, domin ta zama mai amfani gare ka da ma al’ummarka.
Ta yaya haka za ta faru? Ku nazarci wannan littafi da natsuwa da basira, domin kuwa yana ƙunshe da hikimomi ta sigar tsokaci, misalai, falsafa da shawarwari da jagora.
__________
Za a ci gaba ranar Lahadi, in sha Allah
