Hukumar NDLEA Ta Kama Ɗan Indiya Da Muggan Ƙwayoyi Na Naira Biliyan 3.9
Daga Bashir Yahuza Malumfashi
__________
Wani ɗan kasuwa ɗan Indiya, Gupta Ravi Kumar, tare da wasu ‘yan Najeriya uku: Ogunlana Noah Olanrewaju, Olushola Idrees Kayode da Bakare Korede Muheeb sun shiga hannun jami’an hukumar NDLEA, sakamakon kama su da aka yi da kwalabe miliyan biyu da dubu 248 na Tramadol (200mg/225mg) a Filin Jirgin Sama na Murtala Muhammed (MMIA), Ikeja, Lagos.
Wannan Tramadol da aka kama, kamar yadda Daraktan Watsa Labarai na Hukumar, Femi Babafemi ya bayyana, ya kai darajarta Naira biliyan 3.9 kuma an shigo da shi ne daga Delhi, Babban Birnin ƙasar Indiya. An samu maganin ne a ɓoye cikin katon-katon 114. Jami’an hukumar sun bankaɗo shi ne a wani jirgin Ethiopian Airlines da ya iso Legas a ranar Litinin, 8 ga Satumba, 2025.
“Yadda lamarin ya faru shi ne, bayan isowar jirgin daga Indiya, jami’anmu sun saka ido a kansa, inda cikin lokaci suka yi dirar mikiya kan wani dillalin shigo da kaya da direbobi biyu, waɗanda suka yi ƙoƙarin fitar da kayan da manyan motoci biyu ranar Juma’a, 11 ga Satumba.” A cewar Jami’in Watsa Labaran Hukumar, Femi. Ya ƙara da cewa, wannan bincike ne ya kai su ga kama ɗan kasuwar mai suna Gupta Ravi Kumar, yayin da yake ƙoƙarin karɓar kayan.
Haka kuma, a wani ƙoƙarin, jami’an na NDLEA, a ranar Lahadi, 7 ga Satumba, sun kama wani fasinja, Onyeganochi Stanley Ifeanyi, da yake kan hanyarsa ta zuwa birnin Doha a jirgin Qatar Airlines. Da suka bincika akwatinsa, sun gano tabar wiwi mai nauyin giram 900. Ya ce wani ɗan Najeriya ne da ke zaune a Qatar, Ohadiegwu Anthony Uchenna, ya ba shi akwatin don ya kai masa Doha.
Da jami’an suka tsananta bincike, sun sake cafke Uchenna, wanda ya raka shi filin jirgin. A ɗakinsa da ke Ajao Estate, an gano ƙarin giram 200 na wannan tabar. Ya amsa cewa shi ne zai dawo daga Doha daga baya ya karɓi akwatin idan Onyeganochi ya tsallake binciken tsaro.
Shugaban Hukumar NDLEA, Birgediya Janar Mohamed Buba Marwa (mai ritaya) ya yaba da ƙoƙarin jami’an nasa da ke aiki a sassa daban-daban na ƙasar nan. Ya kuma buƙace su da su ci gaba da bin tsarin daidaito wajen yaƙi da miyagun ƙwayoyi.
__________
